Derecho di outor pa kreadó: kon bo ta regl’é ònlain?
Ora abo komo kreadó pone bo trabou disponibel ònlain, bo por alkansá un públiko grandi i tin biaha un públiko ku bo no a ferwagt. Un bunita oportunidat ku ta trese algun reto tambe kuné. Por ehèmpel tokante derecho di outor. Kon bo ta regla esaki korektamente? Nos ta splika bo!
Komo kreadó semper bo tin di haber ku derecho di outor, tambe den e ámbito digital. Si bo ke hasi bo trabou disponibel digitalmente, ta bon pa bo tin un bon bista riba bo posishon hurídiko. Bo ta fotógrafo i bo ke pone bo potrètnan riba Flickr? Of bo ta aktor i bo ke kompartí un pida di un funshon via Twitter? Di un talkshow host ku ke stream un show live via su propio kanal te un kompositor ku ke pone un komposishon riba Youtube, gustosamente nos ta yuda bo ku e siguiente preguntanan.
Kuminsá orientá a base di e preguntanan akí
Kiko bo ta pone ònlain i dikon?
E promé pregunta ta, kiko eksaktamente bo ke pone ònlain i dikon bo ke hasié? Bo ke pa hende por wak bo trabou so òf nan ta haña e oportunidat pa download e tambe? Bo ke pa otro hende por adaptá bo trabou libremente òf reus’é, òf solamente bou di sierto kondishon? Bo ke pa nan menshoná bo nòmber ora nan ta reusá bo trabou òf no ta nesesario? I nan por usa bo trabou pa meta komersial òf preferiblemente nò?
Kontestando e preguntanan akí ta yuda bo determiná bou di ki kondishon bo ke kompartí bo trabou. Bo por registrá esaki den un lisensia òf kondishon di uso. Esaki ta posibel ku un Creative-Commons-licentie (CC). E lisensia akí ta indiká tur usadó kiko ta permití òf no permití pa hasi ku bo trabou.
Tep: Determiná kua ta e mihó lisensia pa bo trabou. Pa determiná esei, bo por usa e tool útil akí di Creative Commons: Choose a License.
Ken ta e doñonan legal?
Ora bo krea un trabou nobo, outomátikamente ta bini derecho di outor riba dje. Bo no mester hasi nada i usadónan no tin mag di reusá bo trabou sin pèrmit.
Banda di bo propio derechonan, tambe ta importante pa tene kuenta ku derecho di otro hende. Si bo a hasi e trabou huntu ku otro hende òf bo ta parti e derechonan òf si bo ta hasi uso di algu di otro hende. Por ehèmpel un kolaborashon ku músiko, kompositor, koreógrafo òf un produsente, i e uso di un poema, teksto, potrèt òf obra di arte. Pidi pèrmit pa pone trabou ònlain i wak bou di ki kondishon bo ta hasié.
Pidi pèrmit pa publiká trabou ònlain ku bo a hasi ku otro hende.
Pèrmit pa uso ònlain
Pèrmit di e doñonan legal pa usa e trabou den un produkto físiko òf live, no ke men outomátikamente ku bo tin pèrmit pa sigui kompartié ònlain. Pidi pèrmit pa hasi esaki eksplísitamente serka esnan ku ta doño legal si bo tin intenshon di kompartí e trabou ònlain.
Un eksepshon: trabou di ámbito públiko
Obra ku no tin derecho di outor mas riba dje pasobra e kreadó a fayesé 70 aña pasá òf mas aña pasá, bo por usa libremente. Tambe pa meta komersial. Riba bo adaptashon ta surgi derecho di outor nobo. Kon otro hende por reusá bo obra, bo por registrá pa medio di lisensia.
Unda bo ta pone bo obra ònlain?
Tin diferente manera pa bo pone bo trabou disponibel ònlain. Bo por hasié via bo propio wèpsait, wèpsait di un terser partido, via social media òf plataforma ònlain manera YouTube i Bandcamp.
E plataformanan akí tin nan propio kondishonnan bou di kua bo por hasi bo obra disponibel. Averiguá kiko e kondishonnan ta enserá pa bo propio posishon (hurídiko).
Kua modelo di entrada bo ta usa?
Bo ke hasi bo trabou disponibel gratuitamente òf bo ke haña un rekompensa p’é? Kua tarifa bo ta bai usa pa ki sorto di obra? Komo kreadó bo mes por saka lisensia òf kondishon di uso den kua bo ta deskribí kiko otro hende por hasi ku bo trabou.
Komo modelo di entrada bo por skohe por ehèmpel pa downloads pagá òf un sistema di abono direktamente for di bo wèpsait. Algun ehèmpel popular ta: Lubach TV (ta habri un lenk eksterno), kaminda bo por wak e grabashonnan di e show di Arjan Lubach kontra pago, Unveil (ta habri un lenk eksterno), un plataforma global pa fotografia di arte ku ta hasi uso di teknologia di blockchain, i por último Wattpad (ta habri un lenk eksterno), un plataforma kaminda outornan por kompartí nan historia i kuentanan ku un komunidat di lesadó global.
